វិធីកំចាត់អារម្មណ៍ធុញថប់
ការរស់នៅប្រចាំថ្ងៃរមែងគេចមិនផុតពីអារម្មណ៍ធុញថប់ដែលអាការៈបែបនេះជាសញ្ញាបង្ហាញប្រាប់ពីភាពតប់ប្រមល់ដូចជា ឈឺក្បាល ឈឺពោះ ហើមពោះ ក្តៀនលាមក រាករូសអស់កម្លាំង បេះដូងលោតញាប់ អារម្មណ៍ឆេវឆាវ យំគ្មានពេលលោះ ធុញថប់ អាហារទទួលទានកាន់តែច្រើនទៅជាដើម។ ដើម្បីកំចាត់បញ្ហានេះគួរសាកល្បងតាមវិធីសាស្រ្តដូចខាងក្រោម៖
បើកបេះដូង ប្រសិនបើមានអារម្មណ៍ថា បញ្ហានេះលើសពីសមត្ថភាពខ្លួនឯងនោះគួររកទីប្រឹក្សាឬចៅហ្វាយនាយ សមាជិកក្នុងគ្រួសារ ឬមិត្តភក្តិអោយពួកគេបានស្តាប់។
កែសម្រួលបរិស្ថានកន្លែងធ្វើការអោយបានល្អដូចជា ប្រមែប្រមូលឯកសារទុកដាក់អោយមានរបៀបរៀបរយ សំអាតតុ និងកៅអីធ្វើការ រកទេសភាពស្អាតៗ ឬផ្កាឈើមកតុបតែងដើម្បីជួយរំសាយកែវភ្នែកនិងអារម្មណ៍។
ឈប់សំរាក ចាត់ទុកថា ជាវិធីបង្កើនកម្លាំងកាយនិងកម្លាំងចិត្តតស៊ូនឹងបញ្ហា រួមទាំងការហាត់ប្រាណឬក៏ធ្វើការងារជួយសង្គមនឹងអ្នកបាត់បង់ឱកាស ក្រៅពីនោះក៏អាចធ្វើការងារកំប៉ិកកំប៉ុកដែលខ្លួនចូលចិត្តរួមជាមួយសមាជិកគ្រួសារឬមិត្តភក្តិដើម្បីជួយរំសាយការធុញថប់។
ទទួលទានអាហារទប់ស្កាត់ភាពតប់ប្រមល់ បង្កើនអាហារពពួកកាបូអ៊ីដ្រាតដែលមានកាកសសៃច្រើនដូចជាអង្ករសំរូប បាយដំណើប ដំឡូង ពោតដែលមានវីតាមីនប៊ី និងសេរ៉ូតូនីនក្នុងកម្រិតខ្ពស់ ព្រមទាំងបន្លែពណ៌បៃតងឬក៏ផ្លែឈើពណ៌ស្រស់ៗដែលផ្តល់អោយនូវវីតាមីនសេនឹងសារជាតិទប់ស្កាត់ពពួកមេរោគ។ ក៏ប៉ុន្តែគួរកាត់បន្ថយបរិមាណខ្លាញ់ អំបិល ស្ករ និងផ្អាកកាហ្វេព្រមទាំងភេសជ្ជះស្រវឹងផងដែរ៕