រដូវក្តៅ​ប្រយត្ន័​កើត​រោគ​រាក​រូស​

This item was filled under News

អាការៈ​រាក​រូស​មាន​មូលហេតុ​កើត​ចេញ​មក​ពី​ការ​ទទួល​ទាន​អាហារ​កាល​ពី​យប់​ចំអិន​មិន​បាន​ល្អ​និង​អាហារ​ដែល​មិន​ស្អាត​ ហើយ​​បើ​កាន់​តែ​ស្ថិត​នៅ​ក្នុង​ពេល​វេលា​រដូវ​ក្តៅ​ដូច​សព្វ​ថ្ងៃ​នេះ​អាច​កាន់​តែ​ធ្វើ​អោយ​អាហារ​ឆាប់​​ផ្អូម​បង្ក​បាន​នូវ​ភាព​ប្រឈម​ងាយ​ឡើង​ទៀត​។​ ដូច្នេះ​មុន​នឹង​ទទួល​ទាន​អាហារ​គួរ​ជ្រើស​រើស​ទទួល​ទាន​អាហារ​ណា​ដែល​ចំអិន​ហើយ​ភ្លាម​ៗ​ ព្រោះ​​ប្រសិន​បើ​ទទួល​ទាន​អាហារ​សំណល់​អាច​នឹង​ធ្វើ​អោយ​កើត​អាការៈ​រាក​រូស​បាន​ដូច​ជា​ការ​បន្ទោរ​បង់​លាមក​រាវ​យ៉ាង​ហោច​៣​ដង​ឬ​បន្ទោរ​បង់​ចេញ​សុទ្ធ​តែ​ទឹក​លាយ​ជា​មួយ​នឹង​សំបោរ​ដែល​យើង​ហៅ​ថា​មួល​ឈាម​មួយ​ដង​ក្នុង​រយៈ​ពេល​១៤​ម៉ោង​។

នៅ​ក្នុង​ចន្លោះ​ខែ​មីនា​ដល់​ខែ​មិថុនា​ដែល​ជា​រដូវ​ក្តៅ​ឈាន​ដល់​ដើម​រដូវ​ភ្លៀង​និង​ធ្វើ​អោយ​អ្នក​ជម្ងឺ​រោគ​រាក​រូស​ច្រើន​បំផុត​ដែល​មូលហេតុ​មួយ​ភាគ​ធំ​បណ្តាល​មក​ពី​ការ​ទទួល​ទាន​អាហារ​លាយ​ឡំ​និង​មេរោគ​។​ ក្នុង​នោះ​អាច​មក​ពី​មេរោគ​បាក់​តេរី​វីរុស​ព្រូន​និង​សារជាតិ​ពុល​ពី​មេរោគ​Torim ។​ ភាគ​ច្រើន​អ្នក​ជមឹ្ង​នឹង​មាន​អាការៈ​ក្នុង​រយៈពេល​១​​-២៤​ម៉ោង​ក្រោយ​ពី​បាន​ទទួល​ទាន​មេរោគ​ចូល​ដែល​គេ​ច្រើន​មាន​អាការៈ​ឈឺ​ខ្មួល​ៗ​ រមូរ​រក​កល​ចង់​ក្អួត​ បត់​ជើង​ញឹក​ញាប់​ដែល​អាច​មាន​លក្ខណៈ​ជា​ទឹក​​ឬ​សំបោរ​លាយ​ឈាម​អាច​គ្រុន​ក្តៅ​និង​​មាន​អាការៈ​អស់​កម្លាំង​ដោយ​សារ​បាត់​បង់​ជាតិ​ទឹក​។​ អាការៈធ្ងន់​ធ្ងរ​ចំពោះ​អ្នក​ជម្ងឺ​កូន​ក្មេង​ឬ​អ្នក​ដែល​មាន​អាយុ​ខ្ពស់​ឬ​អ្នក​ដែល​មាន​រោគ​ប្រចាំ​កាយ​ដូច​ជា​រោគ​ទឹក​នោម​ផ្អែម​ រោគ​គ្រលៀន​វា​អាស្រ័យ​ទៅ​លើ​មេរោគ​ដែល​ជា​មូលហេតុ​ដូច​ជា​មេរោគ​ថៃ​ហ្វយ​ មេរោគ​មួល​ជា​ដើម​។

ការ​ប្រតិបត្តិ​ខ្លួន​នៅ​ពេល​កើត​រាក​រូស

១-​នៅ​ក្នុង​ជំហាន​ដំបូង​ត្រូវ​ជំនួស​ដោយ​ទឹក​ដែល​បាន​បាត់​បង់​ទៅ​តាម​រយៈ​ការផឹក​ទឹក​រ៉ែ​ដែល​មាន​លក់​នៅ​តាម​ទី​ផ្សារ​ទូទៅ​។​ ក៏​ប៉ុន្តែ​ប្រសិន​បើ​រក​ទិញ​មិន​បាន​ក៏​អាច​ធ្វើ​ដោយ​ខ្លួន​ឯង​បាន​ដោយ​ប្រើ​អំបិល​កន្លះ​ស្លាប​ព្រា​កាហ្វេ​ ស្ករ​ស​៨​ស្លាប​ព្រា​កា​ហ្វេ​លាយ​ជា​មួយ​ទឹក​ទទេ​១​លីត្រ​។

២-​គួរ​ទទួល​ទាន​អាហារ​ដែល​ងាយ​រំលាយ​ដូច​ជា​បបរ​សាម​ចូក​និង​ចៀស​វាង​អាហារ​រស់ជាតិ​មុត​និង​ទឹក​ដោះ​គោ​។

៣-​គួរ​ពិភាក្សា​ជា​មួយ​គ្រូ​ពេទ្យ​នៅ​ពេល​កើត​មាន​អាការៈ​ធ្ងន់​ធ្ងរ​រហូត​មិន​អាច​ស៊ូ​ទ្រាំ​បាន​ដូច​ជា​គ្រុន​ក្តៅ​ខ្លាំង​ បត់​ជើង​ធ្លាក់​សុទ្ធ​តែ​ឈាម​ឬ​អាការៈ​មិន​បាន​ល្អ​ប្រសើរ​បាន​ក្នុង​រយៈពេល​២៤​ម៉ោង​ក្រោយ​មក​៕

រំលូត​គភ៌​​ចាប់​ពី​២​ដង​ឡើង​ទៅ​ងាយ​នឹង​ប្រឈម​មុខ​ការ​​ប្រសូត្រ​បុត្រ​មិន​គ្រប់​ខែ​

This item was filled under Love and Heath

ស្ត្រី​ទាំង​ឡាយ​ណា​ដែល​រំលូត​គភ៌​(កូន​ក្នុង​ផ្ទៃ​)​រាប់​ចាប់​ពី​២​ដង​ឡើង​ទៅ​គឺ​ដល់​ពេល​មាន​គភ៌​ក្រោយ​មក​ទៀត​ងាយ​ប្រឈម​មុខ​នឹង​ប្រសូត្រ​កូន​មិន​គ្រប់​ខែ​។​ កាន់​តែ​រំលូត​ច្រើន​ដង​ការ​ប្រឈម​មុខ​នឹង​កូន​ប្រសូត្រ​មក​មិន​គ្រប់​ខែ​កាន់​តែ​ខ្ពស់​​ទៅ​តាម​ហ្នឹង​ដែរ​។

ចំពោះ​កុមារ​ដែល​ប្រសូត្រ​មក​មិន​គ្រប់​ខែ​កើត​មាន​បញ្ហា​សុខភាព​យ៉ាង​ខ្ពស់​បំផុត​គឺ​ក្នុង​ចំណោម​កូន​កើត​មិន​គ្រប់​ខែ​១០​នាក់​ត្រូវ​តែ​មាន​ម្នាក់​យ៉ាង​តិច​ដែល​កើត​ជម្ងឺ​សួត​ ពិការ​ខួរក្បាល​ គ​ ថ្លង់​។​ នាពេល​បច្ចុប្បន្ន​នេះ​ស្រ្តី​នៅ​លើ​ពិភព​លោក​ដែលពុំ​ចង់​មាន​បុត្រ​តែង​តែ​ជ្រើស​រើស​យក​វិធី​រំលូត​គភ៌​នេះ​ក្នុង​បរិមាណ​មួយ​ដ៏​ខ្ពស់​បំផុត​។ ដោយ​ឡែក​ការ​ស្រាវ​ជ្រាវ​ក៏​បាន​ទាំង​បង្ហាញ​អោយ​ឃើញ​ផង​ទៀត​ថា​ពិត​ជា​មាន​ទំនាក់​ទំនង​គ្នា​រវាង​អត្រា​នៃ​ការ​រំលូត​គភ៌​ជា​មួយ​នឹង​ករណី​ប្រសូត្រ​មិន​គ្រប់​ខែ​។

ប្រសិន​បើ​រំលូត​គភ៌​មួយ​លើក​នោះ​អត្រា​ដែល​អាច​ប្រឈម​មុខ​នឹង​ជម្ងឺ​កូន​ប្រសូត្រ​មិន​គ្រប់​ខែ​អាច​មាន​ដល់​ទៅ​២០​ភាគរយ​ចំពោះ​ទារក​ដែល​នៅ​ក្នុង​គភ៌​មាន​អាយុ​៣៧​សប្តាហ៍​។

ដោយ​ឡែក​មាន​ការ​ប្រថុយ​ប្រថាន​កើត​មិន​គ្រប់​ខែ​​គឺ​គភ៌​មាន​អាយុ​បាន​តែ​ត្រឹម​៣៤​សប្តាហ៍​នោះ​វិញ​មាន​អត្រា​ដល់​ទៅ​៥០​ភាគរយ​ឯណោះ​។

ស្ត្រី​ដែល​រំលូត​គភ៌​ចាប់​ពី​២​ដង​ឡើង​ទៅ​អត្រា​ប្រសូត្រ​បុត្រ​មក​មិន​គ្រប់​ខែ​អាច​កើន​ឡើង​ដល់​ទៅ​ទ្វេដង​ ហើយ​កាន់​តែ​​ធ្ងន់​ធ្ងរ​ផង​ទៀត​នោះ​អាច​កើន​ដល់​ទៅ​២,៥​ដង​។

តាមរយៈ​ការ​សិក្សា​ស្រាវជ្រាវ​បាន​លើក​ឡើង​ថា​ គេ​នៅ​ពុំ​ទាន់​រក​ឃើញ​អំពី​មូលហេតុ​ដែល​នាំ​អោយ​ទំនាក់​ទំនង​គ្នា​យ៉ាង​ដូច្នេះ​រវាង​ការ​មានគភ៌​ឬ​រំលូត​កូន​ក្នុង​ផ្ទៃ​ជា​មួយ​នឹង​ករណី​ទារក​ប្រសូត្រ​មក​មិន​គ្រប់​ខែ​យ៉ាង​នេះ​។

មាន​ការ​សង្ស័យ​ថា​ប្រហែល​ជា​ដោយ​សារ​តែ​ស្ត្រី​តែង​តែ​រំលូត​កូន​យ៉ាង​នេះ​ញឹក​ញាប់​ពេក​ទើប​បណ្តាល​អោយ​មាន​បញ្ហា​ដល់​ស្បូន​ ឬ​ក៏​ដោយ​សារ​តែ​មាន​ការ​ចម្លង​បាក់​តេរី​អ្វី​នៅ​ក្នុង​ស្បូន​ក៏​មិន​ដឹង​។

តាម​ការ​សន្និដ្ឋាន​បែប​យ៉ាង​នេះ​អ្នក​ជំនាញ​វេជ្ជសាស្រ្ត​មួយ​ចំនួន​បាន​ឆ្លើយ​ថា​ជា​រឿង​សម​ស្រប​នោះ​ហើយ​ព្រោះ​តែ​ស្បូន​របស់​ស្រ្តី​តែង​តែ​រង​របួស​នៅ​ពេល​រំលូត​យ៉ាង​នេះ​ ហើយ​តាម​ក្បួន​វេជ្ជសាស្រ្ត​គឺ​កំណត់​យ៉ាង​ច្បាស់​ថា​ ការ​រំលូត​​គភ៌​ស្បូន​ត្រូវ​ធ្លាក់​ចុះ​ខ្សោយ​ឬ​រង​របួស​ដែល​ករណី​បែប​យ៉ាង​នេះ​ហើយ​ទើប​បាន​ជា​ពេល​មាន​គភ៌​លើក​ក្រោយ​មក​ទៀត​ក៏​ត្រូវ​ប្រសូត្រ​កូន​មក​មិន​គ្រប់​ខែ​៕

សម្លេង​​តន្រ្តី​មាន​ឥទ្ធិពល​ឆ្ពោះ​ទៅ​ដល់​បេះ​ដូង​

This item was filled under News

សាស្រ្តា​ចារ្យ​លូសៀ​ណូ​បឺណាឌី​ពី​សាកល​វិទ្យាល័យ​អាវីអា​ប្រទេស​អ៊ី​តាលី​បាន​បង្ហើប​អោយ​ដឹង​ថា​ថាមពល​របស់​តន្រ្តី​អាច​ព្យាបាល​មនុស្ស​បាន​ដោយ​បទ​ចម្រៀង​មាន​ឥទ្ធិពល​ទៅ​ដល់​សសៃ​ឈាម​និ​ង​សួត​។​ សម្លេង​តន្រ្តី​លាន់​ខ្លាំង​ៗ​វា​ជួយ​បង្កើន​សម្ពាធ​ឈាម​ អត្រា​លោត​នៃ​បេះ​ដូង​ ការ​ដក​ដង្ហើម​របស់​អ្នក​ស្តាប់​បាន​។​ ក៏​ប៉ុន្តែ​ប្រសិន​បើ​ស្តាប់​បទ​ភ្លេង​ស្រាល​ៗ​វា​នឹង​ជួយ​អោយ​មាន​អារម្មណ៍​ធូរ​ស្រាល​ដែល​ការ​រក​ឃើញ​នេះ​អាច​ជួយ​ធ្វើ​អោយ​យើង​នាំ​យក​បទភ្លេង​ចូល​ទៅ​ប្រើ​រួម​គ្នា​ជា​មួយ​ឱសថ​ដើម្បី​ស្តារ​ស្ថានភាព​អ្នក​ជម្ងឺ​។

ការ​ពិសោធន៍​របស់​សាស្រ្តា​ចារ្យ​បឺណាឌី​បាន​ធ្វើ​ឡើង​ដោយ​អោយ​ក្រុម​អ្នក​ស្មគ្រ័​ចិត្ត​ស្តាប់​បទចម្រៀង​ខ្លាស់​ស៊ិក​ដូច​ជា​ បទ​ចម្រៀង​វ៉ាថែនស៊ីអេរ៉ូ​នៅ​ក្នុង​ល្ខោន​អូបេរ៉ា​ណា​បុក​កូ​របស់​វ័រ​ឌី​។​ លទ្ធផល​បាន​បង្ហាញ​អោយ​ឃើញ​ថា​ ខណៈ​ពេល​ដែល​ក្រុម​ស្មគ្រ័​ចិត្ត​ស្តាប់​បទ​ចម្រៀង​អត្រា​នៃ​ការ​លោត​សង្វាក់​បេះ​ដូង​និង​សម្ពាធ​ឈាម​ឡើង​កាន់​តែ​ខ្ពស់​។ ក៏​ប៉ុន្តែ​ក្រោយ​ពេល​មិន​បាន​ស្តាប់​អត្រា​នៃ​សង្វាក់​បេះ​ដូង​និង​សម្ពាធ​ក៏​ចុះ​ទាប​វិញ​​៕